Лондоннинг "Арсенал" клуби марказий ҳимоячиси Габриэль дос Сантос кетма-кет иккинчи ўйинда гол урди.
Шанба куни бразилиялик футболчи "Борнмут" дарвозасини ишғол қилиб, таблода 1:1 ҳисобини қайд этди. Иккинчи бўлимда Деклан Райс дубль қайд этиб, "канонирлар"га сафарда муҳим ғалабани келтирди (3:2). Squawka хабарига кўра, Габриэлнинг ҳисобида лондонликлар сафида Премьер-лига доирасида киритилган 20та гол бор - бу ҳимоячилар орасида клуб тарихидаги иккинчи кўрсаткичдир. 28 ёшли футболчи франциялик Лоран Косьелни рекордини такрорлаш учун икки марта гол уриши керак.
Габриэль "Арсенал" сафида 2020 йилдан буён тўп тепиб келмоқда. Англия чемпионатининг жорий мавсумида у ўз ҳисобига 3 та гол ёздириб қўйди.
