"Крузейро" форварди Габриэл Барбоза фаолиятини "Сантос"да давом эттиради. Бу ҳақда клуб матбуот хизмати хабар берди.
28 ёшли бразилиялик ҳужумчи янги жамоасида жорий йил якунига қадар ижара асосида тўп тепади.
Эслатиб ўтамиз, "Габигол" лақаби билан танилган Барбоза "Сантос" футбол академияси тарбияланувчиси ҳисобланади. У ушбу жамоа сафида 207 та учрашув ўтказиб, 83 та гол урган ва 13 та голли узатмани амалга оширган.
Европада Габриэл Миланнинг "Интер" ва Лиссабоннинг "Бенфика" клубларида ўйнаган. Бразилия терма жамоаси сафида форвард 18 та ўйинда майдонга тушиб, бешта гол урган.
