Польша футболининг энг иқтидорли ўсмирларидан бири, ҳужумчи Оскар Петушевски Португалияга кўчиб ўтишга яқин. "Ягеллония"нинг 17 ёшли футболчиси хизматига "Порту" қизиқиш билдирмоқда, деб хабар беради Polsat Sport.

Манбага кўра, клублар аллақачон трансфер ва 3 йиллик шартнома бўйича дастлабки келишувга эришган. Келишув суммаси 10 миллион евродан сал камроқ бўлади, аввалроқ "Ягеллония" 11 миллион еврони талаб қилганди.

Жорий мавсумда асосан чап қанот вингери сифатида ҳаракат қилаётган Петушевски клуб миқёсида 31 та ўйинда майдонга тушиб, 3 та гол урди, 4 та огоҳлантириш олди ва 2 та голли узатмани амалга оширди.