Италиянинг "Аталанта" клуби форварди Адемола Лукманни ўз сафига қўшиб олмоқчи бўлган Туркиянинг "Фенербахче" клуби уни сотиб олиш шарти билан ижарага олишни таклиф қилди. Бу ҳақда Hurriyet хабар бермоқда.
Манбага кўра, таклиф суммаси 35 (5+30) миллион еврони ташкил этади. Италия жамоаси бунга рад жавобини бериб, нигериялик ҳужумчини фақат тўлиқ трансфер нархи эвазига қўйиб юбориши мумкинлигини маълум қилди.
Катта эҳтимол билан "Фенербахче" бу шартларни қабул қилади. Агар келишув имзоланадиган бўлса, бу фақат 28 январдан кейин рўй беради, бу эса "Аталанта"нинг Чемпионлар Лигасидаги иштироки билан боғлиқ.
Лукман жорий мавсум 16 та ўйинда майдонга тушди ва 3 та гол ҳамда 1 та голли узатмага муаллифлик қилди.
