Марокаш терма жамоаси ҳамда «Реал» клуби ҳужумкор ярим ҳимоячиси Браҳим Диас Африка миллатлар кубоги тарихига кирди. 26 ёшли футболчи мусобақанинг финал босқичида кетма-кет бешта ўйинда гол урган илк футболчига айланди.

Жорий Африка миллатлар кубогида Диас марокашликлар иштирок этган ҳар бир баҳсда ўз номини таблога ёздириб қўйди: гуруҳ босқичида Комор ороллари (2:0), Мали (1:1) ва Замбия (3:0) дарвозаларига биттадан гол урди. Кейин эса 1/8 финалда Танзанияга қарши баҳсда (1:0) ва чорак финалда Камерун билан ўйинда (2:0) ҳам гол муаллифи бўлди. Ушбу голли серия Марокашнинг ярим финалга чиқишида муҳим роль ўйнади. Бу босқичда жамоа Жазоир — Нигерия жуфтлиги ғолиби билан тўқнаш келади.

Маълумот учун, Браҳим Диас Испанияда туғилган, Испания ёшлар терма жамоалари сафида ўйнаган ва миллий жамоа учун ўртоқлик учрашувларида ҳам иштирок этган. Бироқ 2024 йилда у спорт фуқаролигини ўзгартириб, отасининг Ватани ҳисобланмиш Марокаш терма жамоасини танлади.