"Барселона" қанот ҳужумчиси Ламин Ямал Испания Ла Лигасининг декабрь ойидаги энг яхши футболчиси деб топилди.
Бу орқали 18 ёшли испаниялик футболчи каталонияликларнинг собиқ ҳужумчиси Лионель Месси, "Атлетико" ва "Вильярреал"нинг собиқ ҳимоячиси Диего Годин ва "Реал" ҳужумчиси Килиан Мбаппе каби футболчилар эришган натижани такрорлашга муваффақ бўлди. Бу ҳақда Livescore портали Х ижтимоий тармоғида хабар берди.
Манбага кўра, кетма-кет иккинчи марта Испания чемпионатида ойнинг энг яхши футболчисига айланган Ямал ушбу совринни икки ой ичида кетма-кет қўлга киритган тарихдаги тўртинчи футболчига айланди. Бунгача Годин 2014 йилнинг апрель ва май ойларида, Месси 2018 йилнинг апрель ва сентябрь ойларида совринни қўлга киритган (ўша йилнинг май ва август ойларида мукофот берилмаган), Мбаппе эса жорий мавсумда кетма-кет икки марта, 2025 йилнинг сентябрь ва октябрь ойларида ойнинг энг яхши футболчиси деб топилди.
Ушбу мукофот 2013 йил сентябрь ойидан бери топширилади. Унинг биринчи ғолиби ҳужумчи Диего Коста эди.
