"Манчестер Юнайтед"нинг вақтинчалик устози Даррен Флетчер жамоанинг янги бош мураббийи олдида турган вазифалар ҳақида гапирди.

Якшанба куни "қизил иблислар" ўз уйида "Брайтон"га имкониятни бой бериб (1:2), Англия кубогини тарк этди. Жамоа кейинги ўйинни янги мураббий бошчилигида ўтказиши тахмин қилинмоқда.

"Кейинги мураббий нимага эришиши керак? Ишонч. Ўйин услубидаги барқарорлик. Ким келмасин, у жамоани жипслаштириши лозим. Натижаларга эришиш орқали ишончни мустаҳкамлаш зарур. Албатта, биз яхши футбол кўрсатишни хоҳлаймиз, аммо аввало бунинг йўлини топиш керак. Ёндашув аниқлангач, тиришқоқлик билан меҳнат қилиш, ижобий руҳда бўлиш ва ўзини бағишлаш талаб этилади," - деди Флетчер ўйиндан кейинги суҳбатда.

17 январь, шанба куни "МЮ" ўз уйида "Манчестер Сити"ни қабул қилади.