Мадриднинг "Реал" клуби ҳужумчи Эндрикни "Лион"даги ижарасидан қайтармоқчи эмас.
19 ёшли бразилияликнинг келишувида шартномани муддатидан олдин бекор қилиш ва футболчини "Реал"га қайтаришни назарда тутувчи банд бор, аммо мадридликлар Хаби Алонсо жамоа бош мураббийлигидан кетганидан кейин уни фаоллаштиришни режалаштирмаяпти.
Банд фақат 20 январгача амал қилади. Бу муддатдан кейин Эндрикнинг жорий мавсум охиригача ижарадан қайтиши имконсиз бўлиб қолади.
"Реал" бразилияликнинг "Лион" сафидаги дебютидан мамнун. Унинг ўзи ҳам янги жамоада бахтиёр.
Эслатиб ўтамиз, Эндрик "Лион" сафидаги дебют ўйинида Франция Кубоги 1/16 финалидан ўрин олган "Лилль"га қарши баҳсда гол урган эди. Унинг голи "Лион"га 2:1 ҳисобида ғалаба келтирди.
