"Барселона" ҳимоячиси Рональд Араухо психологик муаммолардан сўнг майдонга қайтиши ҳақида гапирди.
Уругвайлик футболчи Испания Суперкубоги финалидан ўрин олган "Реал"га (3:2) қарши ўйиннинг 93-дақиқасида захирадан майдонга тушди. У психологик муаммолар туфайли танаффус қилиб, бир ойдан ортиқ ўйнамади.
"Вақтида танаффус қилиш қобилияти ўзингизга бўлган муҳаббат эканлигини тушундим. Ўз ақли ва қалбига ғамхўрлик қилиш таслим бўлиш дегани эмас, бу Худо сукутда ҳам ҳаракат қилишига ишониш дегани.
Танаффус мени тетиклаштирди ва кучлироқ бўлиб қайтишимга имкон берди. Жараён осон кечмади, лекин мана шундай қайтиш катта шараф.
Клубга, жамоадошларимга ва мухлисларга муносабат, меҳр ва ҳурмат учун раҳмат. Кеча шу совринни кўтариб келдим, жуда зўр бўлди. Биз ҳали ҳам биргамиз", - деб ёзди Араухо.
