Европа футбол ассоциациялари иттифоқи (УЕФА) ва Англия, Шотландия, Уэльс ва Шимолий Ирландия футбол федерациялари офсайд қоидасини ўзгартириш ғоясини маъқулламайди, деб ёзади The Times.

Аввалроқ Халқаро футбол ассоциациялари кенгаши 20 январь куни Лондонда бўлиб ўтадиган йиғилишда ўйиндан ташқари ҳолатни аниқлаш қоидаларини ўзгартириш масаласини кўриб чиқмоқчи экани ҳақида хабар берилганди. Ушбу ғоя ташаббускори "Арсенал"нинг собиқ бош мураббийи, ФИФАнинг футболни глобал ривожлантириш бўлими раҳбари Арсен Венгер ҳисобланади. У агар ҳужумкор жамоа футболчиси рақибнинг сўнгги ўйинчисидан бир қисми билан эмас, балки бутун танаси билан олдинда бўлса, офсайд қайд этилишини ёқлаб чиқди.

Манбанинг таъкидлашича, УEФА ва тўртта федерация қоидага киритилиши мумкин бўлган ўзгаришни жуда кескин деб ҳисобламоқда, чунки бу жамоаларнинг чуқурроқ ҳимояланишига туртки бўлади. Ташкилотлар муроса сифатида офсайдни аниқлашда фақат ҳужумчи танасининг исталган қисми ҳолатини ҳисобга олишни, оёқ ва бош ҳолатини эътиборсиз қолдиришни таклиф қилмоқчи.

Бироқ қоида 2026 йилги жаҳон чемпионатидан олдин жорий этилмайди, чунки у аввал синовдан ўтказилиши керак.