Мадриднинг «Реал» клуби директори Эмилио Бутрагеньо «қаймоқранглилар» бош мураббийи лавозимидан Хаби Алонсонинг кетиши масаласи юзасидан фикр билдирди. Бу баёнот испаниялик мураббий шартномани ўзаро келишув асосида эмас, балки клуб раҳбарияти томонидан ишдан бўшатилгани ҳақидаги янгиликлар ва инсайдлар ортидан янгради.
«Хаби билан ҳамкорлик ўзаро келишув асосида якунланди. Биз унга келгусида омад тилаймиз», — дея Бутрагеньонинг сўзларини ижтимоий тармоқ X орқали журналист ва инсайдер Фабрицио Романо келтирди.
Хаби Алонсо «Реал»ни 2025 йил ёзидан бери бошқариб келаётган эди. Унгача у «Байер» клубида фаолият юритган. «Қаймоқранглилар»нинг янги бош мураббийи этиб мадридликларнинг собиқ футболчиси Альваро Арбелоа тайинланди.













