"Манчестер Юнайтед" сардори Бруну Фернандеш қишки трансфер ойнасида клубни тарк этишни режалаштирмаяпти.
Сўнгги кунларда португалиялик хавбек бош мураббий Рубен Аморим истеъфога чиқарилгач, клубдаги келажаги ҳақида ўйлаётгани ҳақида хабарлар тарқалди. Эслатиб ўтамиз, кейинчалик Даррен Флетчер икки ўйинга вақтинчалик бош мураббий этиб тайинланди, Майкл Кэррик эса мавсум охиригача клубни бошқарадиган бўлди.
Бироқ, мураббийлар алмашинуви билан боғлиқ беқарорликка қарамай, Фернандеш ҳамон клубга содиқ, деб ёзади BBC вазиятдан хабардор манбаларга таяниб. Футболчи аввалгидек ёзда, шартномаси тугашига бир йил қолганида вазиятни ўрганишни режалаштирмоқда.
Саудия Арабистонидан қизиқиш сақланиб қолаётганига қарамай, 31 ёшли футболчи "Юнайтед"ни тарк этса, Европада қолишни хоҳлайди.
