"Брайтон" ҳужумкор ярим ҳимоячиси Факундо Буонанотте фаолиятини "Лидс"да давом эттиради. Бу ҳақда журналист Фабрицио Романо ўз ижтимоий тармоқларида маълум қилди.
Манбага кўра, "Лидс" шартнома имзолаш бўйича оғзаки келишувга эришган. "Брайтон" футболчининг "Челси"даги ижарасини тўхтатади, шундан сўнг, Буонанотте "Лидс"га ўтади. "Лидс"даги ижара мавсум охиригача давом этади.
21 ёшли аргентиналик футболчи жорий мавсумда 8 та ўйинда (ўртача 64 дақиқа) майдонга тушди. Буонанотте майдонда ўтказган вақт давомида 1 та гол урди ва 2 та голли узатмани амалга оширди.
Футболчининг Transfermarkt порталидаги нархи 18 миллион еврога баҳоланмоқда.
