Анталия шаҳрида йиғин ўтказаётган «Андижон» жамоаси режага мувофиқ, 16 январь куни иккинчи назорат учрашувида майдонга тушади.

Эслатиб ўтамиз, илк ўртоқлик учрашуви 13 январь куни бўлиб ўтган ва унда «Андижон» Туркиянинг «Сиверек Беледийеспор» жамоасини 3:0 ҳисобида мағлуб этган эди.

Навбатдаги рақиб — Венгриянинг «Вашаш» клуби. Ушбу жамоа Будапешт шаҳрини намоён этади. «Вашаш» клубига 1911 йил 16 март куни асос солинган.

Айни пайтда Венгрия миллий чемпионати II дивизионида иштирок этаётган «Вашаш» 15 турдан сўнг 9 ғалаба, 2 дуранг ва 4 мағлубият қайд этган ҳолда 29 очко билан турнир жадвалида иккинчи ўринни эгаллаб турибди. Жамоанинг тўплар нисбати — 25:15. Клубни 45 ёшли маҳаллий мутахассис Габор Эрош бошқармоқда.

Анталиядаги йиғин доирасида «Вашаш» илк назорат учрашувини Қирғизистоннинг «Азия Талас» жамоасига қарши ўтказиб, 4:0 ҳисобида ғалаба қозонган. Шу тариқа, мазкур беллашув ҳар икки жамоа учун ҳам Анталиядаги иккинчи ўртоқлик учрашуви бўлади.

Маълумот ўрнида, «Вашаш» ўз тарихида 6 марта Венгрия чемпиони ва 4 марта мамлакат Кубоги соҳиби бўлган.

«Андижон» ҳамда «Вашаш» ўртасидаги ўртоқлик учрашуви Тошкент вақти билан соат 18:00 да бошланади.