Antaliya shahrida yig‘in o‘tkazayotgan «Andijon» jamoasi rejaga muvofiq, 16 yanvar kuni ikkinchi nazorat uchrashuvida maydonga tushadi.

Eslatib o‘tamiz, ilk o‘rtoqlik uchrashuvi 13 yanvar kuni bo‘lib o‘tgan va unda «Andijon» Turkiyaning «Siverek Belediyespor» jamoasini 3:0 hisobida mag‘lub etgan edi.

Navbatdagi raqib — Vengriyaning «Vashash» klubi. Ushbu jamoa Budapesht shahrini namoyon etadi. «Vashash» klubiga 1911 yil 16 mart kuni asos solingan.

Ayni paytda Vengriya milliy chempionati II divizionida ishtirok etayotgan «Vashash» 15 turdan so‘ng 9 g‘alaba, 2 durang va 4 mag‘lubiyat qayd etgan holda 29 ochko bilan turnir jadvalida ikkinchi o‘rinni egallab turibdi. Jamoaning to‘plar nisbati — 25:15. Klubni 45 yoshli mahalliy mutaxassis Gabor Erosh boshqarmoqda.

Antaliyadagi yig‘in doirasida «Vashash» ilk nazorat uchrashuvini Qirg‘izistonning «Aziya Talas» jamoasiga qarshi o‘tkazib, 4:0 hisobida g‘alaba qozongan. Shu tariqa, mazkur bellashuv har ikki jamoa uchun ham Antaliyadagi ikkinchi o‘rtoqlik uchrashuvi bo‘ladi.

Ma’lumot o‘rnida, «Vashash» o‘z tarixida 6 marta Vengriya chempioni va 4 marta mamlakat Kubogi sohibi bo‘lgan.

«Andijon» hamda «Vashash» o‘rtasidagi o‘rtoqlik uchrashuvi Toshkent vaqti bilan soat 18:00 da boshlanadi.