Ўтган йилнинг ноябрь ойида бўлиб ўтган машғулотлардан бирида Мадриднинг “Реал” клуби собиқ бош мураббийи Хаби Алонсо жамоа футболчиларидан кескин норози бўлган. Натижада у машғулот чоғида футболчиларга қарата: “Мен болалар боғчасини машқ қилдириш учун келганимни билмасдим!”, дея бақирган. Бу ҳақда Marca нашри хабар берди.

“Бу оддий огоҳлантириш ёки футболчиларнинг эътиборини тортиш учун айтилган навбатдаги танбеҳ эмас эди. Бу — умидсизлик, чарчоқ ва зерикишдан чиққан қичқириқ бўлган. Хаби Алонсо анчадан бери футболчиларининг машғулотларда талаб этилган даражадаги интизом ва масъулиятни намоён этмаётганидан норози эди. Айниқса, тактик талаблар масаласида. Машғулотларда норозилик ифодалари, суст муносабат, пичирлашлар кўпайиб борди. Охири Хаби бунга чидай олмади ва ичида узоқ вақтдан бери йиғилиб келган фикрни очиқ айтди”, дейилади Marca нашри берган хабарда.

Қайд этилишича, футболчиларга нисбатан айтилган ушбу “болалар боғчаси” ҳақидаги ибора Алонсонинг “Реал”даги фаолиятида якуннинг бошланиши бўлиб қолган.

Маълумот учун, Хаби Алонсо ўтган ёздан буён “Реал Мадрид” бош мураббийи лавозимида ишлаб келаётган эди. 12 январь, душанба куни “қироллик клуби” испаниялик мутахассис билан ҳамкорлик тўхтатилганини расман эълон қилди. Унинг ўрнига клуб ёшлар жамоасида ишлаб келаётган Альваро Арбелоа тайинланди.