O‘tgan yilning noyabr oyida bo‘lib o‘tgan mashg‘ulotlardan birida Madridning “Real” klubi sobiq bosh murabbiyi Xabi Alonso jamoa futbolchilaridan keskin norozi bo‘lgan. Natijada u mashg‘ulot chog‘ida futbolchilarga qarata: “Men bolalar bog‘chasini mashq qildirish uchun kelganimni bilmasdim!”, deya baqirgan. Bu haqda Marca nashri xabar berdi.

“Bu oddiy ogohlantirish yoki futbolchilarning e’tiborini tortish uchun aytilgan navbatdagi tanbeh emas edi. Bu — umidsizlik, charchoq va zerikishdan chiqqan qichqiriq bo‘lgan. Xabi Alonso anchadan beri futbolchilarining mashg‘ulotlarda talab etilgan darajadagi intizom va mas’uliyatni namoyon etmayotganidan norozi edi. Ayniqsa, taktik talablar masalasida. Mashg‘ulotlarda norozilik ifodalari, sust munosabat, pichirlashlar ko‘payib bordi. Oxiri Xabi bunga chiday olmadi va ichida uzoq vaqtdan beri yig‘ilib kelgan fikrni ochiq aytdi”, deyiladi Marca nashri bergan xabarda.

Qayd etilishicha, futbolchilarga nisbatan aytilgan ushbu “bolalar bog‘chasi” haqidagi ibora Alonsoning “Real”dagi faoliyatida yakunning boshlanishi bo‘lib qolgan.

Ma’lumot uchun, Xabi Alonso o‘tgan yozdan buyon “Real Madrid” bosh murabbiyi lavozimida ishlab kelayotgan edi. 12 yanvar, dushanba kuni “qirollik klubi” ispaniyalik mutaxassis bilan hamkorlik to‘xtatilganini rasman e’lon qildi. Uning o‘rniga klub yoshlar jamoasida ishlab kelayotgan Alvaro Arbeloa tayinlandi.