«Барселона» президенти Жоан Лапорта «Реал» раҳбари Флорентино Переснинг ёрдами билан ушбу лавозимга сайланган. Бу ҳақда El Confidencial нашри хабар бермоқда.

Сайловлар вақтида Лапорта клуб ҳисоб рақамларига 124,6 миллион евро киритиши керак эди, бироқ унда бунга етарли маблағ мавжуд эмас эди. Шу сабабли Перес тўғридан-тўғри банкка мурожаат қилиб, рақибига ёрдам кўрсатган.

Дастлаб банк тўловни маъқуллашга лоқайдлик билан ёндашган, чунки «Барселона» молиявий инқироз ҳолатида эди ва ўз вақтида тўловни кафолатлай олмасди. Шунга қарамай, Переснинг қатъийлиги натижасида банк охир-оқибат битимга рози бўлган.

«Реал» президентининг бундай хатти-ҳаракатига сабаб ўша пайтда у Лапортани Суперлига лойиҳасида иттифоқчи деб ҳисоблагани билан изоҳланади. Бироқ шундан сўнг «Барселона» ушбу лойиҳани тарк этишга қарор қилди.

2021 йил апрелида Европанинг 12 та етакчи клуби Суперлига ташкил этилганини эълон қилган эди. Улар қаторига «Реал», «Ювентус», «Барселона», «Атлетико», «Милан», «Интер», «Манчестер Юнайтед», «Манчестер Сити», «Челси», «Ливерпуль», «Тоттенхэм» ва «Арсенал» киради. Аммо УЕФА томонидан санкциялар билан таҳдид қилингач, лойиҳа тўхтатилди ва иштирокчиларнинг деярли барчаси Суперлигани тарк этди.