"Ливерпуль"нинг собиқ ҳимоячиси Жейми Каррагер "Челси"нинг ёш таркиби ҳақида фикр билдирди.
"Ёш истеъдодлардан иборат бутун бир жамоа тузиб, улар уч-тўрт йил давомида ривожланади, деган ғоя ишламайди. "Манчестер Юнайтед" ҳам ёш футболчилар ҳисобига ғалаба қозонмаган — уларни тажрибали ўйинчилар ўраб олган ва айнан шу омил муваффақиятга олиб келган. "Челси" 2021 йилда Чемпионлар лигасини ютганида, уларнинг марказий ҳимоячиси ким эди? 37 ёшли Силва", — дея Каррагернинг сўзларини Sky Sports келтирди.
Айни пайтда "Челси" Англия чемпионати турнир жадвалида 34 очко билан олтинчи ўринни эгаллаб турибди. "Кўклар" пешқадам "Арсенал"дан 16 очкога ортда қолмоқда.
