"Аякс" "Арсенал" ҳимоячиси Александр Зинченкони ижарага эмас, сотиб олади.
Аввалроқ, Эредивизия клуби "Ноттингем Форест"да тўп сураётган украиналик футболчини ижарага олаётгани ҳақида хабарлар тарқалган эди.
Voetbal International хабарига кўра, барча томонлар тўлиқ трансферга келишиб олган. Ижара учун "Аякс" тўлаши керак бўлган маблағ энди клуб томонидан 29 ёшли футболчини сотиб олиш учун ишлатилади. Сумма айтилмаган, бироқ инсайдер Бен Жейкобс унинг "кичик" бўлишини таъкидлаган.
Зинченко тиббий кўрикдан ўтса, "Аякс" билан мавсум охиригача шартнома имзолайди. Агар ҳамкорлик муваффақиятли бўлса, клуб ва футболчи шартномани узайтириш масаласини муҳокама қилишлари мумкин бўлади.
