Португалиянинг Мадейра оролида номаълум шахс машҳур футболчи Криштиану Роналдунинг ҳайкалини ёқиб юборди. Саудия Арабистонининг “Ан-Насср” клуби ва Португалия терма жамоаси ҳужумчисига бағишланган ҳайкал Фуншал шаҳридаги Авенида до Мар кўчасида жойлашган. Шунингдек, у ерда ҳужумчига атаб қурилган CR7 номли музейи ҳам бор.

Хабарларга кўра, эркак ушбу ҳаракатини видеога олиб, ижтимоий тармоқлардаги саҳифасига жойлаган. Тасвирларда у мусиқа остида рақсга тушгани, шундан сўнг ҳайкалга ёнувчи суюқлик сепиб, уни ёқиб юборгани акс этган. Видеода блогер бу ҳолатни “Худонинг сўнгги огоҳлантириши” деб атаган. Манбага кўра, мазкур ҳайкал аввал ҳам ҳужумга учраган. Хусусан, 2016-йилда унга зарар етказилгач, кейинчалик ҳайкал CR7 музейи олдига кўчириб ўтказилган.

Мадейра полицияси ҳодиса юзасидан изоҳ бериб, гумонланувчи шахс аниқланганини, бироқ ҳозирча қўлга олинмаганини билдирди. Қайд этилишича, ушбу шахс аввал ҳам шунга ўхшаш ҳолатларда иштирок этган.

Маълумот учун, Криштиану Роналду Португалия терма жамоаси билан Европа чемпиони бўлган, шунингдек, икки бор Миллатлар Лигасида ғолиб чиққан. У беш марта “Олтин тўп” совринини ҳам қўлга киритган. Ҳужумчи фаолияти давомида “Спортинг”, “Манчестер Юнайтед”, “Реал Мадрид” ҳамда “Ювентус” каби жамоаларда тўп сурган. Футболчи ҳозирда Саудия Арабистонининг “Ан-Насср” клуб шарафини ҳимоя қилмоқда.