Мадриднинг "Реал" клуби ҳужумчиси Эндрик ижара асосида тўп тепаётган "Лион"да ёрқин ўйин кўрсатмоқда.
19 ёшли футболчи Франция жамоаси сафида учта ўйинда тўртта гол ва битта самарали узатмани амалга оширди. Яқинда Лига 1 доирасида "Метц"га қарши кечган баҳсда бразилиялик футболчи хет-трик қайд этди.
Журналист Фабрицио Романонинг ёзишича, "Реал"нинг Эндрик бўйича позицияси жуда аниқ: футболчига ҳамон умид қилинмоқда, у қайтганидан кейин Мадридда ўзини кўрсатиш имкониятига эга бўлади. "Лион" ижара муддатини узайтиришга уриниб кўради, бироқ "қаймоқранглилар" хўжайинлари истиқболли ҳужумчини қайтаришни режалаштирмоқда.
Порлаётган юлдузнинг испан гранди билан шартномаси 2030 йилнинг ўрталарига қадар мўлжалланган.
