Madridning "Real" klubi hujumchisi Endrik ijara asosida to‘p tepayotgan "Lion"da yorqin o‘yin ko‘rsatmoqda.
19 yoshli futbolchi Fransiya jamoasi safida uchta o‘yinda to‘rtta gol va bitta samarali uzatmani amalga oshirdi. Yaqinda Liga 1 doirasida "Mets"ga qarshi kechgan bahsda braziliyalik futbolchi xet-trik qayd etdi.
Jurnalist Fabrisio Romanoning yozishicha, "Real"ning Endrik bo‘yicha pozisiyasi juda aniq: futbolchiga hamon umid qilinmoqda, u qaytganidan keyin Madridda o‘zini ko‘rsatish imkoniyatiga ega bo‘ladi. "Lion" ijara muddatini uzaytirishga urinib ko‘radi, biroq "qaymoqranglilar" xo‘jayinlari istiqbolli hujumchini qaytarishni rejalashtirmoqda.
Porlayotgan yulduzning ispan grandi bilan shartnomasi 2030 yilning o‘rtalariga qadar mo‘ljallangan.













