Мадриднинг "Реал" клуби бош мураббийи Альваро Арбелоа ярим ҳимоячи Арда Гюлер ҳақида фикр билдирди.

20 ёшли футболчи Хаби Алонсо қўл остида мавсумни ёрқин бошлади, аммо жамоа натижалари ёмонлаша бошлаганидан кейин туркиялик юлдузда ҳам пасайиш кузатилди. Мураббийлар алмашинувидан сўнг хавбек яна асосий таркибдан мунтазам ўрин ола бошлади.

"Гюлер ҳақида фақат ўз кўзим билан кўрганларимга қараб ҳукм чиқара оламан. Унинг салоҳияти жуда катта, истеъдоди юксак. Арда ажойиб кўриш қобилиятига эга, фантастик узатмаларга эга. У ҳали ёш, ўсиш учун имконияти бор, у тиришқоқлик билан ишлайди.

Биз унинг ярим ҳимоя ва ҳужум чизиғида яққол намоён бўладиган истеъдодини тўлиқ очиб бермоқчимиз. У вақт ўтиши билан жаҳон миқёсида топ-футболчига айланишига шубҳа қилмайман," - дея Арбелоанинг сўзларини келтиради Madrid Universal.

Гюлер жорий мавсумда 32 та ўйинда 3 та гол ва 11 та голли узатмани амалга оширди.