Madridning "Real" klubi bosh murabbiyi Alvaro Arbeloa yarim himoyachi Arda Gyuler haqida fikr bildirdi.

20 yoshli futbolchi Xabi Alonso qo‘l ostida mavsumni yorqin boshladi, ammo jamoa natijalari yomonlasha boshlaganidan keyin turkiyalik yulduzda ham pasayish kuzatildi. Murabbiylar almashinuvidan so‘ng xavbek yana asosiy tarkibdan muntazam o‘rin ola boshladi.

"Gyuler haqida faqat o‘z ko‘zim bilan ko‘rganlarimga qarab hukm chiqara olaman. Uning salohiyati juda katta, iste’dodi yuksak. Arda ajoyib ko‘rish qobiliyatiga ega, fantastik uzatmalarga ega. U hali yosh, o‘sish uchun imkoniyati bor, u tirishqoqlik bilan ishlaydi.

Biz uning yarim himoya va hujum chizig‘ida yaqqol namoyon bo‘ladigan iste’dodini to‘liq ochib bermoqchimiz. U vaqt o‘tishi bilan jahon miqyosida top-futbolchiga aylanishiga shubha qilmayman," - deya Arbeloaning so‘zlarini keltiradi Madrid Universal.

Gyuler joriy mavsumda 32 ta o‘yinda 3 ta gol va 11 ta golli uzatmani amalga oshirdi.