“Бенфика” бош мураббийи Жозе Моуриньо Альваро Арбелоа Мадриднинг “Реал” клубига бош мураббий этиб тайинлангани юзасидан фикрларини билдирди. Мутахассис бу ҳақда Чемпионлар Лигаси 8-туридан ўрин олган “Бенфика” — “Реал” учрашуви (28 январь) арафасида гапирди.

“У менинг болаларимдан бири, собиқ шогирдим. Арбелоа менинг энг севимли футболчиларимдан бири бўлган. У ‘Реал’да тўп сурган энг яхши инсонлардан эди. Уни босим остига олиш деярли имконсиз. Альваро ўз ишига ақл билан ёндашади. Умид қиламанки, у ўзи ўйлаган режаларини амалга ошира олади. Менимча, Альваро дунёнинг исталган жамоасини бошқара олади. Мен унга омад тилайман. Фақат эртанги кун бундан мустасно. Шундан кейин эса доим ғалаба қозонишини тилайман.

Мураббий бўлиш жуда мураккаб иш, чунки ҳар доим сендан кўра кўпроқ биламан, деб ўйлайдиганлар топилади. Альваронинг сафари энди бошланмоқда. Унга бу йўлда омад тилайман, дейди Моуриньо.​

Маълумот ўрнида, Альваро Арбелоа 2010–2013 йиллар оралиғида “Реал” сафида Жозе Моуриньо қўл остида тўп сурган. Ушбу даврда мадридликлар Испания чемпионати, Қирол кубоги ва Испания Суперкубогини қўлга киритган.

Эслатиб ўтамиз, Арбелоа яқинда “Реал” бош мураббийи этиб тайинланди. Мутахассис бунга қадар ўринбосарлар жамоаси — “Кастиля”да ишлаб келаётган эди. У ҳозирга қадар клуб устози сифатида 4 та учрашув ўтказиб, 3 та ғалаба ва 1 мағлубият қайд этган.