Бугун Индонезия пойтахти Жакарта шаҳридаги ФИФА қароргоҳида Осиё кубоги баҳсларида иштирок этаётган 12 та давлат футзал федерациялари вакиллари иштирокида йиғилиш бўлиб ўтди.

Индонезия футзал федерацияси раҳбари Мичел Вистор Цианипар ташаббуси билан ташкил этилган тадбир Осиё футзалини ривожлантириш, клуб ва миллий жамоалар даражасида тажриба алмашиш ҳамда Осиё Чемпионлар лигасига муқобил мусобақа ташкил этиш масалаларига бағишланди.

Йиғилиш аввалида ФИФА вакили футзални ривожлантиришга қаратилган дастурлар ҳамда молиявий қўллаб-қувватлаш йўналишлари ҳақида маълумот берди. Эрон ва Ўзбекистон вакиллари Осиё клублари ўртасидаги Чемпионлар лигасини тиклаш таклифини илгари суришди. Афғонистон томони эса мамлакатда футзал инфратузилмасини ривожлантириш, замонавий спорт заллари қуришда Осиёнинг ривожланган давлатларидан кўмак сўради.

ОФК 2027 йилдан бошлаб клублар ўртасидаги Осиё Чемпионлар лигаси қайта тикланишини ва унда 8 та жамоа иштирок этишини маълум қилди. Мазкур масала ҳали қайта кўриб чиқилиши ва янада такомиллаштирилиши айтилди.

Йиғилиш якунида иштирокчи мамлакатлар футзал федерациялари ўртасида ҳамкорлик меморандуми имзоланди. Унда Осиё футзалини барқарор ривожлантириш, бошқарув тизимини кучайтириш, мусобақалар сони ва сифатини ошириш ҳамда футзал мутахассислари салоҳиятини юксалтиришга қаратилган мажбуриятлар белгиланди.