Лондоннинг “Челси” клуби Мадриднинг “Реал” жамоаси ҳужумчиси Эндрик учун тахминан 80 миллион евро миқдоридаги расмий таклиф тайёрламоқда. Бу ҳақда Topskills Sports UK ўзининг X (собиқ Twitter) саҳифасидаги хабар берди.
Манбага кўра, “кўклар” Эндрикни клубнинг узоқ муддатли спорт лойиҳасида асосий фигуралардан бири сифатида кўрмоқда. Шу билан бирга, бразилиялик ҳужумчига “Атлетико”, “Арсенал” ва “ПСЖ” клублари ҳам қизиқиш билдирмоқда. Бу эса футболчининг трансфер нархини янада ошириши мумкин.
Маълумот учун, Эндрик айни пайтда “Лион” сафида ўйнамоқда. “Қироллик клуби” футболчини мавсум якунига қадар ижарага берган. Бразилиялик ҳужумчи ҳозиргача француз клуби сафида учта учрашувда майдонга тушиб, 4 та гол ва 1 та голли узатмага муаллифлик қилган. Сўнгги ўйинда у хет-трик қайд этиб, жамоасининг 5:2 ҳисобидаги ғалабасига катта ҳисса қўшди. Transfermarkt портали Эндрикнинг бозор қийматини 25 миллион евро деб баҳоламоқда.













