Индонезия мезбонлик қилаётган қитъа биринчилигида 3-тур ўйинлари давом этмоқда. Бугун "С" гуруҳидан ўрин олган терма жамоалар сўнгги тур баҳсларини ўтказишди. Футзалчиларимиз гуруҳ етакчиси Япония терма жамоасига қарши паркетга чиқиб, аламли тарзда мағлуб бўлишди. Биринчи бўлимнинг 9-дақиқасида Шаҳрам Фаҳриддинов гол уриб жамоамизни олдинга олиб чиққанди, бироқ иккинчи бўлимда "самурайлар" иккита гол уриб ғалабани илиб кетишди. Гуруҳнинг иккинчи ўйинида эса Тожикистон ва Австралия терма жамоалари 1:1 ҳисобидаги дурангга имзо чекди.
Шу тариқа, Япония 9 очко билан биринчи, Ўзбекистон эса 4 очко билан иккинчи ўринда чорак финалга йўл олди. Тожикистон ва Австралия учун мусобақа гуруҳ босқичининг ўзидаёқ якунланди.
