Лондоннинг «Арсенал» клуби қанот ҳимоячиси Юррьен Тимбер Англия лига кубоги ярим финалининг жавоб ўйинида «Челси» устидан қозонилган ғалаба (1:0) ҳақида фикр билдирди.
«Стадионда ажойиб муҳит ҳукм сурди. Энди бизни «Уэмбли» кутмоқда. Бизга қарши кучли рақиб ўйнади. «Челси» устидан икки бор ғалаба қозониш — бу бизнинг катта меҳнат қилганимиздан далолатдир. Бизда улкан иштиёқ бор — «Арсенал» ғалабаларга жуда чанқоқ», — дея нидерландиялик ҳимоячининг сўзларини келтирмоқда BBC Sport.
«Тўпчилар»нинг финалдаги рақиби «Манчестер Сити» ва «Ньюкасл» қарама-қаршилигида аниқланади. Биринчи баҳсда Хосеп Гвардиола шогирдлари 2:0 ҳисобида ғалаба қозонишган. Жавоб ўйини 4 февраль куни бўлиб ўтади.
