"Альбасете" клуби ҳимоячиси Хави Морено Испаниянинг икки гранд жамоаси — "Барселона" ва "Реал" Мадриднинг ўйин услубларини ўзаро таққослади.
Испания Сегундаси вакили жорий мавсумда мамлакат Кубоги доирасида ҳар иккала жамоага қарши майдонга тушди. "Альбасете" дастлаб "қаймоқранглилар"ни 3:2 ҳисобида мағлуб этган бўлса, кейинчалик "кўк-анорранглилар"га 1:2 ҳисобида имкониятни бой берди.
"Барселона"да "Реал"га қараганда тартиб анча юқори, мадридликлар эса кўпроқ анархик (тартибсиз) услубда ўйнашади. Бироқ, бошқа тарафдан, бу ҳолат "Барселона"нинг ўйинини олдиндан тахмин қилишга қулайроқ қилиб қўяди", — дея футболчининг сўзларини келтирмоқда Mundo Deportivo.
Маълумот учун, "Альбасете" айни дамда Испания иккинчи дивизиони турнир жадвалида 12-ўринни эгаллаб турибди.
