Мадриднинг «Реал» клуби уй стадионида концерт дастурларини ўтказиш борасида жиддий муаммога дуч келмоқда. Испания пойтахти суди стадиондаги шовқин даражасидан шикоят қилган аҳолининг даъвосини қаноатлантириб, ишни қайта кўриб чиқишга қарор қилди.

Воқеалар ривожи: Эслатиб ўтамиз, «қироллик клуби» 2024 йилнинг кузидан буён стадионда концертлар ўтказишни тўхтатиб қўйган эди. Клуб раҳбарияти мусиқа овозини пасайтириш ва қўшни уйларни товуш ўтказмайдиган қилиб таъмирлаб беришни таклиф қилган, бироқ маҳаллий аҳоли бунга рози бўлмаган. Одамларга нафақат баланд овоз, балки кўп минг сонли мухлисларнинг оқими ҳам халақит бермоқда.

Суднинг сўнгги ҳукми: «Реал» учун ёмон хабар "As" нашри тарқатган хабарга кўра, Мадрид Олий суди қуйи инстанциянинг шикоятни рад этиш ҳақидаги қарорини бекор қилди. Эндиликда:

• Лицензиялар текширилади: Шаҳар кенгаши берган рухсатномалар шаҳарсозлик қоидаларига қанчалик мос келиши қайта кўриб чиқилади.

• Ҳал қилувчи қарор — аҳолида: Суд қарорига кўра, концерт ўтказишга рухсат бериш ваколати шаҳар кенгашида эмас, балки стадион атрофида яшовчи аҳоли ҳамжамиятида бўлиши керак.

Бу клубга қанчага тушади? «Сантьяго Бернабеу»нинг реконструкциясидан сўнг «Реал» стадиондан нафақат футбол майдони, балки йирик даромад келтирувчи маданий марказ сифатида фойдаланишни режалаштирган эди. Концертларнинг тақиқланиши клуб учун миллионлаб евро зарар демакдир.