Январь ойидаги трансфер ойнасининг сўнгги соатларида «Марсель» ҳимоячиси Амир Мурильо кутилмаган тарзда сотувга қўйилди. Бу ҳақда L’Équipe нашри хабар бермоқда.

Захира таркибига ўтказилган Мурильо бошқа бир клубдан таклиф олди, бироқ бу таклиф шу қадар кеч келдики, трансферни якунлаш учун вақт қолмади. Шунга қарамай, Туркияда трансфер ойнаси ҳали очиқ эканини инобатга олсак, футболчи айнан ўша ерга йўл олиши эҳтимоли юқори.

Жаҳон чемпионати олдидан доимий ўйин амалиётига муҳтож бўлган Мурильо «Бешиктош» сафига ўтиши мумкин. Клублар ўртасида 4 миллиондан 6 миллион еврогача бўлган келишув бўйича музокаралар олиб борилмоқда. Футболчи 3,5 йиллик шартномага имзо чекиши мумкин.

Жорий мавсумда 29 ёшли панамалик футболчи 25 та ўйинда майдонга тушиб, 2 та гол ва 4 та голли узатмани амалга оширди. Шунингдек, унинг ҳисобида 5 та сариқ карточка бор.