Лондоннинг «Тоттенхэм» клуби бош мураббийи Томас Франк жамоа сардори Кристиан Ромеро ҳақида ўз фикрлари билан ўртоқлашди.

«Кути — жуда эҳтиросли инсон ва майдонда бор кучини беради. У доим ғалаба қозонишни истайди, шу сабабли баъзида жаҳл устида ўзини тута олмай қолади. Аммо у ўз ишини жуда яхши уддаламоқда», — дея Франкнинг сўзларини келтирмоқда журналист Фабрицио Романо.

Жорий мавсумда 27 ёшли аргентиналик ҳимоячи барча турнирларда 27 та ўйинда майдонга тушиб, 6 та гол урди ва 4 та голли узатмани ўз ҳисобига ёздириб қўйди.

Ромеронинг «шпорлар» билан амалдаги меҳнат шартномаси 2029 йилнинг ўрталаригача мўлжалланган.