7 февраль, жума куни суд ижрочилари "Реал" ҳужумчиси Килиан Мбаппенинг илтимосига биноан "ПСЖ" офисига ташриф буюришди, унга Париж клуби йиғилган таътил пулларини тўламаган, деб ёзади L'Equipe.
Футболчига тегишли бўлган 60,9 млн евродан "ПСЖ" 5,9 млн еврони тўламаган. Бу жамғарилган таътил ҳақи суммаси. Суд ижрочилари парижликларга Мбаппенинг қарзини тўлаш талаби билан тўлов хабарномасини топширди.
Агар Париж клуби Мбаппе билан ҳисоб-китоб қилмаса, суд саккиз кун ичида "ПСЖ"нинг мол-мулкини мусодара қилиши, Франция терма жамоаси сардорининг адвокатлари эса қарз суммасини жамоа ҳисобидан ундириб олиши мумкин. Клубда 19 февралгача апелляция бериш учун вақт бор.
Эслатиб ўтамиз, 2024 йилда Франция Профессионал футбол лигаси (LFP) парижликларни "Реал"га ўтган ҳужумчига 55 миллион евро миқдоридаги маош ва бонуслар бўйича қарздорликни тўлашга мажбур қилган эди. 2025 йил декабрь ойида меҳнат низолари бўйича Париж суди "ПСЖ"ни футболчига таътил пулини ҳисобга олган ҳолда 60,9 миллион евро тўлашга мажбур қилди. Клубнинг собиқ футболчига қўйган молиявий талаблари тўлиқ рад этилди.
