Мадриднинг «Атлетико» клуби ҳужумчиси Хулиан Альварес Англиянинг «Челси» клуби учун асосий трансфер мақсадларидан бирига айланди.
«ESPN Argentina» хабарига кўра, «кўклар» 26 ёшли футболчининг трансфери устида аллақачон иш бошлашган. Томонлар ўртасида музокаралар олиб борилмоқда ва «матрасчилар» ўйинчисининг вакиллари яқинда Лондонда, «Челси» ва «Арсенал» ўртасида бўлиб ўтган Лига Кубоги баҳсида кўриниш беришган. Таъкидлаш жоизки, «канонирлар» ҳам юлдузли аргентиналикка қизиқиш билдираётган клублар қаторида тилга олинмоқда.
«Transfermarkt» порталида Хулиан Альвареснинг нархи 100 миллион евро этиб белгиланган. Илгарироқ ҳужумчи учун асосий даъвогар сифатида «Барселона» кўрсатилаётган эди, бироқ Премьер-лига клублари молиявий масалаларда «кўк-анорранглилар»дан яққол устунликка эга.
