Англия Премьер-лигасининг 2025/2026 йилги мавсуми 25-тури доирасида "Вулверхэмптон" ва "Челси" жамоалари ўртасидаги учрашув якунланди. Унда "кўклар" 3:1 ҳисобида ғалаба қозонишди.
Коул Палмер 13-дақиқада пенальтини аниқ амалга ошириб, лондонликларни олдинга олиб чиқди. 35-дақиқада Палмер яна бир бор "нуқта"дан унумли фойдаланди, 38-дақиқада эса у хет-тригини расмийлаштирди. Мезбонларнинг ягона жавоб тўпини 55-дақиқада Толуваласе Арокодаре киритди.
Ушбу ўйиндан сўнг "Вулверхэмптон" саккиз очко билан Англия олий дивизиони турнир жадвалининг энг қуйи поғонасини эгаллаб турибди. "Челси" эса 43 очко билан бешинчи ўринда жойлашган.
Навбатдаги турда "бўрилар" 11 февраль куни сафарда "Ноттингем Форест" билан тўқнашади, "кўклар" эса 10 февраль куни "Лидс Юнайтед"ни қабул қилади.













