Шанба оқшомида Бирмингемнинг "Астон Вилла" жамоаси "Борнмут" меҳмони бўлиб, ғалабани қўлдан чиқарди — 1:1. Шу тариқа, Унаи Эмери жамоаси 47 очко билан турнир жадвалининг учинчи поғонасида қолди.
Қизиқарли жиҳати шундаки, шанба куни "Тоттенхэм" устидан зафар қучган (2:0) "Манчестер Юнайтед" клуби "Вилла" билан орадаги фарқни атиги уч очкогача қисқартирди. Манкунианликлар ҳисобида 44 очко мавжуд.
Шунингдек, "Манчестер Сити"да ҳам 47 очко бор, бироқ "шаҳарликлар" ўз очколарини якшанба куни, 8 февраль санасида кўпайтириб олишлари мумкин. Ушбу кунда Хосеп Гвардиола шогирдлари олтинчи ўринда бораётган "Ливерпуль" меҳмони бўлади.
АПЛ пешқадами эса 56 очко билан "Арсенал" бўлиб турибди.
