«Тоттенхэм» ҳимоячиси ва сардори Кристиан Ромеро фаолиятидаги навбатдаги қизил карточкани олди.
Англия Премьер-лигасининг 25-тури доирасида «Тоттенхэм» сафарда «Манчестер Юнайтед»га 0:2 ҳисобида имкониятни бой берди. Таъкидлаш жоизки, «шпорлар» Ромеронинг жиддий фоли сабабли ўйиннинг 29-дақиқасидаёқ бир киши кам бўлиб қолишган эди.
«OptaJoe» нашрининг хабар беришича, аргентиналик футболчи 2021 йил август ойида «Тоттенхэм» сафида дебют қилганидан бери барча мусобақаларда жами олти марта майдондан четлатилган. Бу АПЛнинг исталган бошқа футболчисидан кўпроқ кўрсаткичдир.
Жорий мавсумда Ромеро барча турнирларни инобатга олган ҳолда 28 та ўйинда иштирок этди, рақиблар дарвозасини олти марта ишғол қилди ва тўртта голли узатмани ўз ҳисобига ёзиб қўйди.
