Айни пайтда “Машъал” биринчи лигага тайёргарликни Янгиерда давом эттирмоқда. Клуб бош мураббийи Александр Хомяков билан боғланганимизда жароҳат олган Отабек Шукуровнинг ҳолати борасида ўз муносабатини билдирди:

— Шукуров жароҳат олгани боис ҳозир биз билан эмас. У уйида даволаняпти. Шифокорларнинг айтишича, Шукуров яқин ўн кун ичида сафга қайтади ва дастлаб якка тартибда машғулотларни бошлайди. Биз унинг БААда бўлиб ўтадиган ўсмирлар ўртасидаги жаҳон чемпионатида қатнашишини жуда-жуда хоҳлаймиз, шу боис тезроқ сафга қайтиши учун бор имкониятни ишга соляпмиз. Умуман олганда, Шукуров яхши футболчи, у машғулотларда анча тер тўкиб асосий таркибда ўйнашга лойиқлигини исботлаб келмоқда.

Изоҳ: Эслатиб ўтамиз, шу йилнинг 17 октябрь – 8 ноябрь кунлари БААда ўсмирлар ўртасида жаҳон чемпионати мусобақаси бўлиб ўтади. Бунда Дилшод Нуралиев бошқарувидаги Ўзбекистон ўсмирлар термаси ҳам иштирок этади. Футболчиларимиз амалдаги Осиё чемпиони сифатида мазкур турнирда қатнашишади. Отабек Шукуров эса терма жамоамизнинг сардори ҳисобланади.