Ўзбекистон терма жамоаси ҳимоячиси Абдуқодир Ҳусанов Англия Премьер Лигасининг 25-туридан ўрин олган “Ливерпуль” — “Манчестер Сити” учрашувида (1:2) асосий таркибда майдонга тушиб, 61-дақиқада жароҳат сабаб алмаштирилди. Ҳимоячи тўп учун курашда Доннарумма билан тўқнашиб кетди. “Шаҳарликлар” устози Пеп Гвардиола таваккал қилишни истамай, уни Рубен Диашга алмаштирди.
Учрашув давомида Ҳусанов 30 марта тўп билан муомала қилди. Ҳимоячи жами 24 та узатма амалга оширган бўлиб, уларнинг 22 таси аниқ манзилга етиб борди — 92 фоиз аниқлик. Sofascore портали ўзбекистонлик футболчининг ҳаракатларини 6,6 балл билан баҳолади.
Португалиялик ярим ҳимоячи Бернарду Сильва ўйиннинг энг яхши футболчиси деб топилди — 7,7 балл. Футболчи 84-дақиқада “Манчестер Сити”нинг биринчи голига муаллифлик қилди. Шунингдек, учрашув давомида фаол ҳаракатлари билан ажралиб турди. Бир гол ва бир ассист муаллифига айланган Эрлинг Ҳоланд эса 7,5 балл билан “шаҳарликлар” таркибидаги энг яхши иккинчи футболчига айланди. “Ливерпуль” сафида энг юқори баллни Доминик Собослаи олди — 7,7. Футболчи ўйин якунида қизил карточка билан жазоланган бўлса-да, жамоасининг ўйиндаги ягона голини киритди.
Маълумот учун, Пеп Гвардиола бошчилигидаги “Манчестер Сити” 50 очко билан Англия Премьер Лигаси турнир жадвалида 2-поғонани эгаллаб турибди. Жамоа етакчи “Арсенал”дан 6 очкога ортда қолмоқда. Мағлуб бўлган “Ливерпуль” эса 39 очко билан 6-ўриндан жой олган.
