O‘zbekiston terma jamoasi himoyachisi Abduqodir Husanov Angliya Premyer Ligasining 25-turidan o‘rin olgan “Liverpul” — “Manchester Siti” uchrashuvida (1:2) asosiy tarkibda maydonga tushib, 61-daqiqada jarohat sabab almashtirildi. Himoyachi to‘p uchun kurashda Donnarumma bilan to‘qnashib ketdi. “Shaharliklar” ustozi Pep Gvardiola tavakkal qilishni istamay, uni Ruben Diashga almashtirdi.

Uchrashuv davomida Husanov 30 marta to‘p bilan muomala qildi. Himoyachi jami 24 ta uzatma amalga oshirgan bo‘lib, ularning 22 tasi aniq manzilga yetib bordi — 92 foiz aniqlik. Sofascore portali o‘zbekistonlik futbolchining harakatlarini 6,6 ball bilan baholadi.

Portugaliyalik yarim himoyachi Bernardu Silva o‘yinning eng yaxshi futbolchisi deb topildi — 7,7 ball. Futbolchi 84-daqiqada “Manchester Siti”ning birinchi goliga mualliflik qildi. Shuningdek, uchrashuv davomida faol harakatlari bilan ajralib turdi. Bir gol va bir assist muallifiga aylangan Erling Holand esa 7,5 ball bilan “shaharliklar” tarkibidagi eng yaxshi ikkinchi futbolchiga aylandi. “Liverpul” safida eng yuqori ballni Dominik Soboslai oldi — 7,7. Futbolchi o‘yin yakunida qizil kartochka bilan jazolangan bo‘lsa-da, jamoasining o‘yindagi yagona golini kiritdi.

Ma’lumot uchun, Pep Gvardiola boshchiligidagi “Manchester Siti” 50 ochko bilan Angliya Premyer Ligasi turnir jadvalida 2-pog‘onani egallab turibdi. Jamoa yetakchi “Arsenal”dan 6 ochkoga ortda qolmoqda. Mag‘lub bo‘lgan “Liverpul” esa 39 ochko bilan 6-o‘rindan joy olgan.