"Реал" клуби ва Бразилия терма жамоасининг собиқ ҳимоячиси Роберто Карлос Криштиану Роналдунинг фаолиятини якунлашини истамаслигини айтди.

- Криштиану Роналдунинг жаҳон чемпионатидаги иштирокини қандай баҳолайсиз ?

- Криштиану ҳеч қачон тўхтамаслиги керак. Ҳеч қачон. Агар у бир кун келиб фаолиятини якунлашга қарор қилса, унга қўнғироқ қилиб, тўхтамаслигини айтаман (кулади).
У клублар учун ҳам, терма жамоа учун ҳам, болалар ва ёш футболчилар учун ҳам жуда катта аҳамиятга эга бўлган ўйинчилардан бири. У бир оёғида бўлса ҳам, эмаклаб бўлса ҳам футбол ўйнашни тўхтатмаслиги керак. Бошламоқчи бўлган ҳар қандай болага улкан куч ва ғайрат бағишлайди.

- Жаҳон чемпионатида 1000-голини ура оладими?

- Криштиану ва футболни севувчилар учун унинг тарих яратишда давом этиши ва рекордларни янгилашини кўриш ажойиб. 1000та гол урган ягона футболчи Пеле, аммо Криштиану ҳам бу рўйхатдан ўрин олиши мумкин.

Мен уни Саудия чемпионатида бахтли ва ўзига ишонган ҳолда кўраман. Унинг бу маррага эришишига мутлақо ишончим комил. У деярли жароҳат олмайди, яхши ўйнашда давом этмоқда, бошқалар учун намуна бўлиб қолмоқда - Португалия бундан фахрланиши мумкин", - деди Карлос.