ФИФА вице-президенти Жим Бойс Жаҳон чемпионати - 2022ни қишда ўтказиш кераклигини таъкидлаган Англия премьер-лигаси вакилига жавоб берди. Бу ҳақда "Sky Sports" хабар бермоқда.
"АПЛнинг ҳамма эътирозларини тушунаман, лекин шуни эслатиб қўйишни хоҳлардимки, Қатардаги жаҳон чемпионати келаси йил эмас, 9 йилдан сўнг бўлиб ўтади. Бу вақт мукаммал қарорга келиш учун етарли. Европада қишда ўйнай олмайдиган кўплаб мамлакатлар топилади, аммо бу борада эътирозларнинг аксарияти Премьер-лигадан бўлмоқда.
АПЛ вакилларининг ЖЧни қишда ўтказиш биринчиликка уч йилгача таъсир кўрсатиши ҳақидаги фикрларини ўқиб қолдим. Лекин мукаммал тақвим тузишни эпласалар бунинг олдини олиш мумкин.
Қатар иқлими ЖЧни ёзда ўтказиш имконини бермайди. Чунки йилнинг бу мавсумида мамлакатда ҳарорат 50 даражадан ошади. Жаҳон футболининг энг муҳим воқелигини бевосита кузатиш учун келадиган минглаб инсонлар ҳаётини қандай қилиб хавф остига қўйиш мумкинлигини тасаввур қилолмайман", деди Бойс.
