«Барселона» вингери Ламин Ямалнинг отаси Мунир Насравий ижтимоий тармоқларда ўғлига бағишланган пост эълон қилди. Унда у ўғлини илгари «кўк-анорранглилар» ва Аргентина терма жамоаси шарафини ҳимоя қилган афсонавий футболчи Диего Марадона билан қиёслаган. Ямал Ла Лиганинг 23-тури доирасида «Мальорка»га қарши баҳсда (3:0) гол муаллифи бўлди.

«Шунчаки фахрли ота. Ҳамма нарса учун яқинларимга раҳмат», — деб ёзди Мунир Насравий.

Ламин Ямал 18 ёшда. У 2023 йилдан бери «Барселона»нинг асосий жамоасида тўп суриб келмоқда. Жорий мавсумда ёш футболчи клуб миқёсида 30 та учрашувда иштирок этиб, 15 та гол урди ва 13 та самарали узатма амалга оширди. Нуфузли Transfermarkt интернет-портали Ямалнинг бозор қийматини 200 миллион евро деб баҳоламоқда.