«Ювентус» ҳимоячиси Пьер Калюлю А Сериянинг «Лацио»га қарши ўйинидан (2:2) сўнг интервью берди.

Туринликлар зарбалар сони (32:8) ва дарвоза соҳасига аниқ борган зарбалар (8:2) бўйича римликлардан тўрт баравар устунлик қилишди, бироқ мағлуб бўлишлари ҳам мумкин эди: фақат 96-дақиқага келиб Калюлю жамоасини мағлубиятдан қутқариб қолган иккинчи голни урди. Ўйин давомида Лучано Спаллетти жамоаси 0:2 ҳисобида ортда қолаётган эди.

«Мен хафаман. Рақиб кам вазият яратди, лекин барибир иккита гол урди. Биз қўлимиздан келган барча ишни қилдик, ғалаба қозонишни истагандик, аммо афсуски, бу амалга ошмади. Иккинчи голни ўтказиб юборганимиздан кейин яхшироқ ўйнай бошладик ва бу одамни ғазаблантиради, чунки ўйин бошиданоқ шундай ҳаракат қилишимиз керак эди. Бизга рақиб дарвозаси олдида самарадорлик етишмаяпти», — деди Калюлю.

Айнан 25 ёшли франциялик футболчи учрашувнинг энг яхши ўйинчиси деб топилди.