Термиз давлат университети қошида ташкил этилган «ТерДУ» клуби иштирокини Пролигада давом эттиради. Университет ректори Абдуқодир Тошқулов ташаббуси билан клуб энди нисбатан каттароқ Лигада иштирок этади.

Ўтган йилнинг июль ойида Биринчи лига иштирокчиси бўлган «Қизириқ» футбол клуби Термиз давлат университети тасарруфига ўтказилган бўлиб, клуб номи «ТерДУ»га ўзгартирилганди. Шундан сўнг клуб фаолиятида жонланиш кузатилди ва «ТерДУ» мавсумни ўз минтақасида бешликда якунлаб, Тошкент мезбонлик қилган плей-офф босқичида иштирок этди. Олий таълим муассасаси ректори ўз хатида «ТерДУ» Пролига учун талабларни бажаришга тайёр эканлигини маълум қилди.

Термиз шаҳрида профессионал футбол учрашувлари талабларига жавоб берадиган ареналар сони чекланган. Шундан келиб чиқиб, «ТерДУ» «Сурхон» футбол клуби билан шартнома имзолади ва 2026 йилги мавсум давомида унинг захира майдонидан расмий учрашувлар давомида фойдаланиш бўйича келишувга эришди. Мазкур майдон замонавий талаблар асосида бунёд этилган бўлиб, у Пролига учрашувларини қабул қилиш имкониятига эга. Шунингдек, ҳудудда клублар сонининг ортиб бориши эҳтимолий янги майдонлар бунёд этилишига олиб келиши мумкин.

Лига билан келишув асосида «ТерДУ» U19 жамоаси таркиби университетнинг кичик курс талабаларидан ташкил топади. Ўз навбатида, асосий таркиб футболчилари билан Лига талаб қилган кўринишда профессионал меҳнат шартномалари имзоланади. Шу тариқа Сурхондарё вилоятида футбол билан шуғулланаётган ёш футболчилар келажакда қўним топиши мумкин бўлган яна бир клуб босқичма-босқич ривожланиб боради.

Қайд этиш керак, Пролига иштирокчиларининг турли ҳудудлардан эканлиги мамлакат футболини ривожлантириш йўлида муҳим аҳамият касб этади. Бугунга келиб, Суперлига клубларида ўз ўрнини топа олмаган иқтидорлар учун ўзини намоён қилиш имконияти мавжуд бўлган ўрта синф жамоалари сони ортиб бормоқда. Танлов имкониятларининг ошиб бориши эса, ўз навбатида, рақобат муҳитига ижобий таъсир кўрсатиши мумкин.

Лига университетлар қошида ташкил этилаётган футбол клубларининг янги босқичга чиқиб бораётганини олқишлайди. Ишонамизки, қисқа вақт ичида олийгоҳлар нафақат таълим, балки профессионал спорт йўналишидаги имкониятлари билан ҳам ёш авлодни ўзига жалб қила олади.