Сўнгги пайтларда матбуотда Мадриднинг «Реал» клуби ўнг қанот ҳимоячиси Даниэль Карвахаль билан боғлиқ муаммолар фаол муҳокама қилинмоқда.

«Қаймоқранглилар» сардори жароҳатидан тузалиб, қайдномага қайтган бўлса-да, барибир майдонга тушмаяпти. 34 ёшли футболчи юзага келган вазиятдан норози, бу ҳақда яқин кунларда турли манбалар хабар берди. Шунингдек, жамоанинг янги устози Альваро Арбелоа билан келишмовчиликлар борлиги ҳақида ҳам миш-мишлар тарқалган эди.

«Marca» нашрининг маълумотига кўра, пайшанба куни клуб базасида мураббий ва футболчи ўртасида шахсий суҳбат бўлиб ўтган – асосий мавзу латералнинг ҳолати ва унинг келажакдаги истиқболлари бўлган. Манбанинг қайд этишича, учрашув «ижобий» ўтган: томонлар мавжуд масалаларни ойдинлаштириб, ҳал қилиб олишган.

Эслатиб ўтамиз, Даниэль Карвахальнинг «Реал» билан шартномаси жорий мавсум якунида ниҳоясига етади.