Мадриднинг «Реал» клуби марказий ҳимоячиси Антонио Рюдигер Англия Премьер-лигасига қайтиш имкониятини кўриб чиқмоқда.

32 ёшли футболчининг «қаймоқранглилар» билан шартномаси жорий мавсум якунида ниҳоясига етади. «TEAMtalk» нашрининг хабар беришича, германиялик футболчининг ишлари билан шуғулланувчи воситачилар унинг номзодини аллақачон Англия чемпионати вакилларига таклиф қилишни бошлашган ва даъвогарлар қаторида «Тоттенхэм» ҳам бор. Манбага ишонилса, Рюдигер Англияга кўчиб ўтиш учун маошининг сезиларли даражада камайишига рози.

Шунингдек, Лондоннинг бошқа клублари — «Вест Хэм» ёки «Кристал Пэлас»га ўтиш эҳтимоли ҳам истисно этилмаяпти. «Челси»га қайтиш масаласи ҳам муҳокама қилинмоқда, бироқ «кўклар» ёши катта ўйинчиларни таклиф қилишдан қочишади, шу сабабли бу келишувнинг амалга ошиши амримаҳол.