«Барселона» бош мураббийи Ханс-Дитер Флик жамоасининг Испания Кубоги ярим финалигача босиб ўтган йўли ҳақидаги саволга жавоб берди. Каталонияликлар турнир давомида «Гвадалахара» (2:0), «Расинг» (2:0) ва «Альбасете» (2:1) жамоаларини мағлуб этишди. «Кўк-анорранглилар» ярим финалга қадар Ла Лига вакиллари билан тўқнаш келишмади.

— Сиз ҳали бирорта ҳам юқори дивизион жамоаси билан учрашмаганингиз учун Кубокдаги йўлингизни паст баҳолаётганларга нима деган бўлардингиз?

— Иккинчи дивизион жамоалари билан ўйнаш осонми ёки йўқми, буни «Реал»дан сўранг», — деди Флик матбуот анжуманида.

Эслатиб ўтамиз, «Реал» Мадрид январь ойида айнан «Альбасете»га (2:3) имкониятни бой бериб, Испания Кубогини тарк этган эди.

Испания Кубоги ярим финалида «Барселона» «Атлетико» билан иккита ўйин ўтказади. Дастлабки баҳс 12 февраль куни бўлиб ўтади.